تحليل/محمد علام
خلال الأيام اللي فاتت، حصلت كام حاجة كده متكلمتش عنها وسائل الإعلام العربية أو حتى الغربية بما فيه الكفاية، برغم إن معانيهم الخفية خطيرة جدًا، ويمكن تكون من أخطر الخطوات اللي خدتها إسرائيل على مستقبل العالم العربي والإسلامي كله…
🔸️ الحاجة الأولى حصلت من ٣ أيام لما وزير الخارجية الأمريكي افتتح بنفسه طريق للحجاج اليهود بيمر من تحت أساسيات المسجد الأقصى…وده تمهيدًا لبدء تهويد مدينة القدس الشرقية وضمها للسيادة الإسرائيلية وهدم المسجد الأقصى بالكامل…
🔸️ والتانية هي سلسلة من الاقتحامات المتكررة للمسجد قبل منها بأسابيع، حصل فيها شيء المفروض يكون جرس إنذار للمسلمين في أنحاء العالم كله… نفخ بوق “الشوفار” بداخل حرم المسجد، واللي معناه في العقيدة اليهودية هو فرض السيطرة الرمزية والدينية أخيرًا على الأقصى، واعتباره رسميًا “الهيكل الثالث”…
⚫️🟡 اللي جاي ده بحث استقصائي شامل، هحكيلك فيه عن الحدثين دول وعلاقتهم ببعض، وهنغوص فيه جوه التاريخ اليهودي الخفي وراهم، واللي بيخليهم من أخطر الأحداث اللي حصلت خلال فترة الحرب على غزة، وبمثابة تمهيد لخطط إسرائيل التوسعية على حساب العالم العربي والإسلامي…
من أسابيع قليلة، وتحديدًا في نهاية شهر أغسطس اللي فات، في عدد كبير من المستوطنين الصهاينة اقتحموا باحات المسجد الأقصى وسط حماية كاملة من شرطة الاحتلال…
واحد من ضمن المقتحمين دول بقى كان كاهن يهودي… وفجأة وأثناء الاقتحام، طلع بوق غريب كده وقعد ينفخ فيه شوية قدام كاميرات الإعلام وعيون الناس!
🟢 البوق ده لو أنت مش عارف هو إيه، اسمه “الشوفار”… ولو فاكر انه مجرد آلة موسيقية أو طقس ديني عابر بيعملوه هناك، يبقى للأسف انت لسه مش مدرك ومش فاهم خطورة الموضوع…
النفخ في البوق ده بالذات بالنسبة للصهاينة المتطرفين مش مجرد طقس ديني ولا استفزاز… ده عبارة عن رسالة وإعلان بيقولوا بيها إنهم فرضوا سيادتهم خلاص على المسجد الأقصى، وإنهم رسميًا بيتعاملوا معاه بإعتباره الهيكل اليهودي الثالث!
🟣 طب ازاي؟ وأيه المهم أوي كده في بوق “الشوفار” ده يعني؟
عشان تفهم، تعالى معايا نرجع بالزمن لورا شوية… وخلي بالك إن كل اللي هحكيهولك ده مبني على التفسيرات اليهودية، عشان تبقى فاهم سياق القصة عندهم جاي منين…
🟠 مبدئيًا كده، تاريخ بوق الشوفار ده قديم جداً، وبيرجع للتوراة نفسها… وهو عبارة عن بوق ضخم بيتعمل من قرن كبش أو ماعز، وبيستخدموه وينفخوا فيه في مناسبات وأعياد دينية زي رأس السنة العبرية أو يوم الغفران…
وعشان كده؛ فـ كلمة شوفار نفسها في العبرية معناها الحرفي هو “قرنٌ ينفخ فيه”…
بالنسبة بقى لأي يهودي متدين، فـ صوت الشوفار ده دايمًا بيبقى معناه بداية زمن جديد أو دعوة للتوبة، أو حتى إعلان للحرب والانتصار على الأعداء… يعني هو داخل في كل حاجة عندهم تقريبًا، وقريب من مفهوم صوت الأذان كده عند المسلمين…
وحتى في الثقافة اليهودية، عندهم فكرة ان الإله نفسه بيتواصل معاهم عن طريق صوت البوق، وإنهم غير مسموحلهم يسمعوا صوت الإله وإلا يموتوا..
🔹️ وهو ده بالمناسبة نفس البوق اللي استعمله قائدهم الأسطوري جَدعون أو “يربعل”، عشان يهزم جيش المديانيين Midianites” اللي ورد ذكره في التوراه..
🔵 بس المهم بقى انه مع مرور السنين، البوق ده خرج من كونه مجرد أداة طقسية ودينية، وبقى سلاح رمزي للسياسة الإسرائيلية في قلب القدس…
🟡 عشان في العصر الحديث، ولما اتكونت إسرائيل وبقت عاملة نفسها دولة، بدأت تستخدم نفس البوق ده بنفس المعاني بس بشكل سياسي…
مثلًا سنة ١٩٥٦، بعد ما الجيش الإسرائيلي احتل سيناء، الحاخام “شلومو جورين” –اللي هو كان حاخام الجيش وقتها– نفخ في الشوفار فوق جبل سيناء… ودي ساعتها كانت رسالة بتقول ان الأرض دي بقت بتاعتهم خلاص، ومبقتش ملك للمصريين…
وبعدها سنة ١٩٦٧، لما احتلوا القدس الشرقية، نفس الحاخام ده وقف عند تلة المغاربة ونفخ في البوق… وساعتها المشهد اتوثق، وبقى علامة على “تحرير القدس” من المسلمين وعودتها لليهود على حسب زعمهم…
ومن وقتها، النفخ في الشوفار بقى عادة سنوية في “عيد الاستقلال”، اللي هو بالنسبة للفلسطينيين ذكرى النكبة…
🔴🟢 بس اللي حصل بقى من أسابيع، لما الكاهن نفخ بالبوق ده جوه المسجد الأقصى، وبعدين اتكررت تاني كذا مرة آخرهم بحسب تقرير للجزيرة كان يوم 14 سبتمبر اللي فات من 5 أيام ده، هو يعتبر أخطر حدث في وسط كل دول…
وده ليه؟!
🔹️ عشان النفخ في الشوفار جوه المسجد الأقصى نفسه له معنى تاني خالص…
⚫️ الباحث زياد أبحيص، المتخصص في شؤون القدس، شرح الموضوع في تقرير صادم عملته الجزيرة من فترة، وقال إن النفخ في البوق بالنسبة للجماعات اليهودية المتطرفة اللي بتقتحم الأقصى تحت حماية الشرطة الإسرائيلية، مش بس مجرد إعلان سيادة، بل كمان بيعتبروه علامة على بداية مرحلة جديدة من الزمن اليهودي…
طب يعني أيه مرحلة جديدة؟
🟣 يعني ببساطة، بالنسبة لجماعات الهيكل المتطرفة، اللحظة دي بتعلن إن زمن وجود المسجد الأقصى كرمز إسلامي انتهى، وإن الخطوة الجاية هو إنهم هيهدموه بالكامل عشان يبنوا الهيكل الثالث مكانه!
طيب ثانية واحدة… هو أيه الهيكل الثالث ده؟
🟠 الهيكل ده يا سيدي المفروض في عقيدتهم انه المعبد اليهودي اللي كان اليهود بانيينه في القدس في الأرض الموعودة حسب الرواية الدينية اليهودية… أول هيكل فيهم اتبنى في عهد النبي سليمان حسب روايتهم، وبعدها اتهدم… بعد كده اتبنى هيكل تاني في نفس المكان واتدمر هو كمان…
ومن وقتها، فكرة بناء “الهيكل الثالث” بقت حلم ديني عند الصهاينة المتطرفين، وبيقولوا إن خلاصهم وظهور المسيح المنتظر مش هيحصل غير لما يتبني… والمكان اللي لازم يتبني فيه هو بالضبط موقع المسجد الأقصى وقبة الصخرة…
🟡🔵 يعني بمنتهى الوضوح: عشان يبنوا الهيكل، لازم الأقصى يتهد، والقدس كلها تبقى عاصمة إسرائيل… وده بالضبط هو اللي بيمهدوله دلوقتي وبيعلنوا رسميًا لشعبهم انهم هيعملوه، من خلال عمليات نفخ البوق دي…
طب هل ده مجرد كلام؟
من ٣ أيام بالضبط، وزير الخارجية الأمريكي “ماركو روبيو” كان في زيارة للقدس..اللي انت متعرفوش بقى ومخدتش بالك منه عشان محدش اتكلم عنه في الإعلام، هو إن الزيارة دي مكانتش عادية…
🔵 الاتنين في قلب الزيارة دي افتتحوا رسميًا هناك مشروع كان الكيان الصهيوني شغال عليه بقاله سنين طويلة في السر ومحدش يعرفه ولا متابع أخباره…
⚫️ المشروع ده إسمه “طريق الحُجّاج”، واللي هو عبارة عن طريق ونفق طويل بيبدأ من حي سلوان الفلسطيني، ويمتد لحد ما يوصل ويعدي من تحت أساسات المسجد الأقصى وقبة الصخرة ويوصل لحائط البراق!
الطريق ده في الرواية اليهودية هو اللي كان بيمشي عليه اليهود زمان وهما رايحين يحجوا ويعملوا طقوسهم حوالين الهيكل اللي المفروض انه اتدمر قبل 2000 سنة…
ومعنى إن وزير الخارجية الأمريكي نفسه يوافق على مشاركة إسرائيل في افتتاحه (في نفس يوم القمة العربية الإسلامية الطارئة)، فالموضوع هنا مبقاش خبر عادي…
🔴 ده إعلان سياسي واضح إن الأمريكان شايفين ان المكان ده “أرض إسرائيلية”، وإن الأقصى مبقاش مسجد إسلامي، بل هو “أرض مقدسة يهودية”… ولاحظ ان أمريكا بالفعل نقلت السفارة بتاعتها للقدس في 2018، وقت فترة ترامب الأولى…
واللي بيأكدلك إن الموضوع مش مجرد كلام، وإنهم خلاص ناويين يضموا القدس ويهدموا المسجد كله قريب، هو الكلام اللي قاله نتنياهو أثناء الافتتاح…
🔹️ قالك أيه بقى؟
قال بالنص كده: “القدس مدينتنا وليست مدينتكم، وستبقى مدينتنا دائمًا ولن تقسم مرة أخرى”… والكلام ده كان بيرد بيه على تصريح للرئيس التركي إردوغان من كام يوم، كان بيقول فيه إن القدس تاريخيًا تابعة للمسلمين، وإن الدولة العثمانية كانت ليها شرف الإشراف عليها لمدة 400 سنة…
🟡 يعني الموضوع خلاص أصبح مُعلن، ومش مجرد كلام بيتقال في الغرف المغلقة… وسبب حدوثه دلوقتي هو إنهم شايفين الضعف والصمت المذهل اللي الأمة الإسلامية والعربية فيه، وان محدش بيعملهم حاجة، فـخلاص قرروا بقى إنهم يكملوا مخططاتهم كلها وياخدو اللي عايزينه كله ومأجلينه بقالهم سنين عشان (كانوا) خايفين من المسلمين والعرب…
🟢 فهل يا ترى هنفضل نتفرج لحد ما نصحى في يوم قريب نلاقي الأقصى اتشال من على وش الأرض؟
عن الكاتب
