وحدة الشئون البرلمانية
في أجواء هادئة على غير الوتيرة خارجه، حاول وزير النقل كامل الوزير تبرئة نفسه من حادث تصادم قطارى الجيزة، خلال تلبيته الاستدعاء البرلمانى المتأخر من لجنة النقل والمواصلات بمجلس النواب.
كاشفا عن كواليس الحادث من وجهة نظره، قال الوزير جملة واحدة، السائق قفل نظام الأمان، والنظام ده معمول أصلًا عشان القطر يقف تلقائيًا لو السائق نام أو غلط، ومع ذلك، 7 ماتوا و125 اتصابوا.
فالسؤال مبقاش: مين قفل الزرار؟ السؤال بقى: إزاي زرار واحد لسه قادر يلغي نظامًا معمولًا عشان يحمي أرواح الناس؟
وكشف الوزير أمام لجنة النقل والمواصلات كواليس لم تكن معلنة بنفس الوضوح قبل الجلسة، بقوله، كان المفروض النظام يرشده «يمشي 20 كم» فقط، مش يكمل بسرعته العادية ويصطدم بقطار واقف قدامه.
وهنا الوزير استخدم تعبيرًا لافتًا، وقال للنواب: «شوفوا العفاريت»، في إشارة إلى حجم العبث والتلاعب اللي حصل في منظومة التشغيل يوم الحادث، مش مجرد خطأ واحد من شخص واحد.
وكلامه ده بيربط مباشرة بتحقيقات النيابة اللي قالت: السائق قفل النظام، ومراقب وناظر المحطة سابوا لوحة برج الإشارة، والمراقب اتلاعب في الدفتر، وتم حبسهم، وتشكلت لجنة من هندسة القاهرة لفحص اللاسلكي والإشارات والمنظومة كلها.
اعرف أكثر
ونفي الوزير الاتهامات الموجهة له خلال الساعات الأخيرة بقوله للنواب: أنا لم أوجّه بغلق النظام، بل جرّمت تعطيله بشكل صريح، واللي حصل كان فعلًا بشريًا متعمدًا من أفراد داخل المنظومة.
بس السؤال اللي ردود الفعل رجّعته تاني بعد الجلسة: إذا كان التعطيل مجرّمًا، والنظام معمول عشان يمنع الكارثة حتى لو السائق غلط، فليه التعطيل كان ممكنًا أصلًا؟ ومين اللي كان المفروض يكتشفه قبل ما القطر يتحرك؟
وفي نفس الجلسة، قال الوزير إن 20 مهندسًا وفنيًا بيفحصوا القطارات قبل التشغيل، وإن الإجراءات موثقة في دفتر «20 ت»، وإن أمن وسلامة الركاب على رأس الأولويات.
وهنا النواب سألوا: لو فيه 20 مهندسًا ودفتر توثيق، إزاي قطر يطلع ونظام الأمان بتاعه مقفول، ومحدش يلاحظ؟، ولم يجد الوزير ردا مناسبا.
«محدش هيخلد في الوزارة».. تصريح الوزير اللي قلب الجلسة، شارحا، «هناك أقاويل إني مش هطلع من الوزارة، لا كلنا هنطلع ومحدش هيخلد فيها، ولو طلب مني أي حاجة بعدين لن أتأخر ولن أتخلى عن بلدي أبدا».
وشگر رئيس مجلس النواب ورئيس لجنة النقل، على استدعاء الوزارة لتوضيح أسباب الحادث ونتائجه، والإجراءات قبل وقوعه ويوم حدوثه وأثناء التعامل مع تداعياته، والخطوات المستقبلية لمنع تكراره.
وأشاد بالدور الوطني والإنساني للنواب، خاصة أعضاء لجنة النقل، في التواصل مع أسر الضحايا والمصابين، ومتابعة التداعيات، وتخفيف معاناة المتضررين، ونقل مطالبهم للجهات المعنية.
وشدد على تكاتف مؤسسات الدولة وأبناء الشعب، خاصة في الأزمات، وعدم الانسياق وراء الشائعات أو محاولات التشكيك التي تستهدف النيل من مؤسسات الدولة أو بث الفرقة والإحباط.
لكن ردود الفعل على التصريح نفسه كانت منقسمة تمامًا، بين مؤيدين شافوا فيه وطنية واستعدادًا للخدمة في أي موقع، ومنتقدين قالوا: «طب ما تطلع بكرامتك»، واعتبروا الكلام محاولة لامتصاص الغضب من غير قرار واضح.
عن الكاتب
