دينا عماد
بعد 6 حلقات اللي نزلوا من مسلسل لا ترد ولا تستبدل، نرصد إيجابيات كثيرة وسلبيات قليلة للمسلسل.
١/ التوعية الصحية اللي في المسلسل من خلال القصة أهم وأفضل بكتير من كلام كلنا بنسمعه طول الوقت سواء التحذير من المسكنات أو الاهتمام بالتغيرات اللي ممكن تحصل في الجسم وبنتجاهلها غالبا ..وكأنه بيدينا روشتة للوقاية.
٢/ مراعاة التفاصيل والبعد عن الاستسهال.. وده جه في مشهد الغسيل الكلوي لما كان فيه دكتور حقيقي “وممثل” بيركب الماهوكر واللي شفت أطباء كتير لفت نظرهم المشهد، وأشادوا بيه “احنا كمشاهد عادي مش هناخد بالنا” بس كونه اتعمل بالدقة دي .. تحسب جدا لصناع العمل.
٣/ القصص الإنسانية في المسلسل تنوعها عجبني خاصة أنه تم إلقاء الضوء على أكثر من قصة… الطفلة ضعيفة السمع مع الفقر ..مريضة الفشل الكلوي ومشاعرها وآلامها.. اللاجئين اللي بيتم استغلالهم من سماسرة الاعضاء
٤/ أداء الممثلين كلهم رائع .. السعدني ماشاء الله متألق الفترة الأخيرة وكأن لام شمسية كان وش خير عليه.
٥/ المسلسل فيه حاجة مهمة جدا وهي إبراز قيمة الصحة اللي ممكن تروح في لحظة ..فمهم جدا أننا نحمد ربنا دايما .. وندعي ربنا ما يحرمنا من صحتنا ابدا ولا يبدل حالنا إلا لأحسنه
ملحوظات معجبتنيش .. وده رأي شخصي بحت في موضوع المسلسل اجتماعيا مش في المسلسل نفسه كعمل درامي
من وجهة نظري مش مطلوب أبدا من أي شريك أنه يتبرع للطرف التاني بجزء من جسمه .. لو جت فضلا من الشريك حاجة جميلة جدا وتُقدر ..لكن لو مجتش فمش من حق الطرف الأول أنه يزعل منه “الطرفين سواء رجل أو ست”.
فكرة الهانم المتجوزة اللي هتحب السواق الغلبان .. مش بحبها “رغم أنها بتحصل واقعيا”.
كنت هحب قصتهم أكتر لو جوزها مثلا تخلى عنها وسابها.. وهي حبت بعد الانفصال .. كانت هتبقى مقبولة.
في المجمل المسلسل حلو أوي ومهم .. ومنتظرة باقي الحلقات بشغف.
عن الكاتب
