خلال ال 24 ساعة اللي فاتت حصلت حاجات مهمة ومحورية لمستقبل المنطقة لازم تبقى عارفها، تعالى نمر عليهم سريعًا 👇
أول حاجة حصلت من دقايق فاتت… المقاومة أعلنت أخيرًا موافقتها المبدئية على خطة ترامب بعد ما قعدت يومين تقريبًا بتراجعها… بس الموافقة دي مكانتش موافقة كاملة، بل فيها مراوغة سياسية وتعديلات مهمة…
طب أيه هي؟!
🟢 أولًا كده وعشان تبقى فاهم، الحركة قالت إنها “توافق على الإفراج عن كل الأسرى دفعة واحدة، وتسليم إدارة القطاع لهيئة فلسطينية من التكنوقراط المستقلين”… يعني هما معندهمش مشكلة يتخلوا عن السلطة ويطلقوا سراح الأسرى كلهم في وقت واحد..
وبكده ف هما حطوا نتنياهو في مأزق قدام شعبه، اللي بقالهم شهور طويلة بيتظاهروا عشان يرجعوا أسراهم، ولو هو اللي رفض دلوقتي ممكن يدخل في صدام سياسي كبير جوه اسرائيل…
بس في جزئية تخليهم عن السلطة دي بقى تحديدًا، قالوا حاجة مهمة… قالوا ان رحيلهم عن السلطة هيكون مرتبط بـ”موقف وطني جامع” و”توافق فلسطيني” هو اللي يكون على الأرض بيحكم القطاع… ورفضوا وجود أي قوة عربية أو دولية تدير غزة غير الفلسطينيين… ودي نقطة جوهرية بتنسف واحد من أهم بنود خطة ترامب ال 21!
🔹️ طب وبالنسبة لموضوع تسليم السلاح؟!
🟠 البيان بتاعهم مذكرش أي حاجة عن الجزئية دي.. بس واحد من قياداتها في تصريح للجزيرة قال إنهم مش هيسلموا السلاح إلا بعد انتهاء الاحتلال بالكامل، وإن أي مفاوضات على السلاح هتكون في سياق تفاوض وطني جامع.. وده طبعًا مفهوم، لإنهم أكيد مش هيسيبوا سلاحهم بدون ضمانات ان الاسرائيليين هينسحبوا بالكامل من القطاع وهيكون في طريق لدولة فلسطينية…
🔵 يعني باختصار وعشان نلخص الموضوع كله بتبسيط: المقاومة وافقوا على الهدنة وعلى صفقة تبادل الأسرى بشكل كامل، لكن في نفس الوقت رفضوا نزع السلاح، ورفضوا وجود أي إدارة أجنبية في القطاع…
🔹️🔴🟡 ترامب قال في تصريح على تروث سوشيال إن “اسرائيل يجب أن توقف قصف غزة” حتى “نتمكن من اخراج الأسرى بسلام”، وقال انه “يبدو ان حما.س أصبحت جاهزة للسلام”… ف نتمنى ان الكلام يكون حقيقي ويكون نواة لوقف اطلاق النار فعلا ونهاية الكابوس
🟡 بس على الناحية التانية بقى، في تطور مختلف ومرتبط بنفس الموضوع، هيخليك تتأكد اننا غالبًا رايحين في اتجاه تصعيد أكبر، هو اللي أمريكا بتعمله دلوقتي في البحر المتوسط! 👇
حسب تقارير من وكالات عالمية زي رويترز و NBC، ف أمريكا خلال الأيام اللي فاتت دفعت بحاملة الطائرات “يو إس إس فورد” للبحر المتوسط… ودي لو انت نتعرفش، تعتبر أضخم وأحدث قطعة في أسطولها البحري كله، ووجودها في المنطقة مش مجرد استعراض قوة، بل هو (بناءً على السوابق التاريخية) بيحصل دايمًا قبل انفجار الحروب الكبيرة…
🔹️ والموضوع موقفش هنا…
🔴 كمان حسب تقارير ومصادر عسكرية، ف الجيش الأمريكي خلال الساعات اللي فاتت زاد عدد منصات منظومة الدفاع الصاروخي THAAD في إسرائيل، إلى 11 قاذف، بعد ما كان العدد 6 فقط قبل كده… وفوق ده كمان الجيش الأمريكي زود اسرائيل برادارات جديدة لنظام الدفاع الجوي من نوع متطور اسمه AN/TPY-2…
وعشان أقرب الصورة ذهنك بس، عايز اقولك ان خلال حرب ال 12 اللي فاتت في شهر 7 مع إيران، اسرائيل كلها كان عندها بطاريتين بس من نوع ثاد.. ودول اصلا كانوا يعتبروا كتير لإن دي أحدث واقوى منظومات دفاع جوي في امريكا كلها…
🟢 ف تخيل بقى لما اقولك مفاجأة تانية، هي ان دلوقتي العدد هيزيد ويبقى 3 بطاريات، بعد ما ظهر خبر من قريب ان في بطارية ثاد تالتة اتنقلت بالفعل من الإمارات لإسرائيل من شهر!
وكمان الأتقل من كده، هو ان في صور أقمار صناعية انتشرت في الصحافة، ظاهر فيها توسيعات في البنية التحتية لأنظمة الدفاع في اسرائيل، وتطويرات ضخمة في الأنظمة اللوجستية..
🟣 لو حطيت بقى كل التحركات دي جنب بعضها، هتلاقي ان كلها بتأكد على حاجة واحدة.. ان اسرائيل وأمريكا بيحضروا نفسهم لحرب كبرى هتقوم في الشرق الأوسط قريب.. وكل اللي هما بيعملوا دلوقتي هو انهم بيجهزوا ليها…
🟠 وفي المقابل إيران هي كمان رفعت مستوى تجهيزها بشكل كبير، وفي تقارير عسكرية بتقول انهم بيعملوا “أكبر حشد عسكري في تاريخهم”، وبينقلوا صواريخهم الباليستية لمواقع محصنة في باطن الجبال، استعدادًا لما هو قادم…
🔸️ ف يا ترى هل المعركة هتقوم بين إيران واسرائيل فعلًا، وكل اللي بيحصل من اتفاقات في غزة دلوقتي ده تمهيد ليها؟! ولا الموضوع تمويه وخدعة، واللي هيحصل هيكون حرب على جبهة تانية مختلفة؟!
عن الكاتب
One thought on “محمد علام يسطر: هل يهرب نتنياهو من مأزق حماس لحرب إيران؟”