من فانز زوون: أحمد بدوى
ناس كتير بتسألني عن تجربة مشاهدة المباريات في النهر الاخضر في العاصمة الجديدة
الفان زون
وازاي بتروح
اولا انا عندي دعوات بحكم اني راجل كبير سنا، فبيجيلي دعوات
بس أي حد يقدر يدخل يسجل من علي الموقع ومشكلته أن الإقبال عليه شديد
tazkarti.co/Fanzone
بس أنا روحت تلاتة الفجر تقريبا في ماتش مصر ونيوزلندا، كان الدخول متاح للطلبة بكارنيه الجامعة، مش عارف ده أوبشن دائم ولا كان إمبارح بس.
الأفضل تركن العربية عند محطة المونوريل في التجمع وتركب لغاية بوابة ٧ ودي اللي فيها الدخول والفعاليات.
المونوريل مجانا بالمناسبة رايح جاي وتقريبا فيه مونوريل كل ١٠ دقايق حتي، والماتش شغال يعني للناس اللي بتحب تمشي قبل نهاية الماتش.
لو خدت عربيتك أعمل حسابك ممكن تمشي كيلو ولا اتنين عشان كم العربيات اللي راكنة يمين وشمال الطريق رهيب.
لو فكرت تركن عربيتك ورا أي عربية وتنزل تدخل الماتش علي أساس أنك هتطلع في نفس وقت الشخص اللي أنت قافل عليه أقولك لو الشخص طلع قبلك لأي سبب بيكلم المرور بيجي ونش يسحب عربيتك وابقي دور عليها.
لما تروح متأخر زي حالاتي أنسي أن فيه دعوات وvip والكلام ده أقعد في أي حتة النهاردة كان فيه ٥٠ ألف مشجع علي الأقل
الأجواء حلوة ومنظمة رغم الزحام والمطاعم كتير ومتنوعة فيه ماكدونالدز وبيتزا وشاورما وفيه أكشاك وشاي وقهوة
طبعا المكان فيه حمامات كتير
فيه برضو أماكن للصلاة الناس صلت الفجر وقت استراحة بين الشوطين
وفيه ناس كتير صلت الفجر ودخلت تشوف الماتش بعد كده
نصيحتي لازم تروح بدري وخد ولادك معاك هتستمتع
المصريون شعب مبهج مش هتبطل ضحك من الايفهات اللي شغالة علي اللاعبين طول الماتش
الناس ملتزمة ومحترمة وأغلبها أسر وعائلات
بجد تحية لأصحاب فكرة الفانز زون وللتنظيم الراقي والفعاليات المبهجة
اشوفكم الماتش الجاي إن شاءالله
عن الكاتب
