حجم إنفاق محمد صلاح على أعمال الخير في مصر كبير للغاية ، وفيه مراكز لعلاج ادمان المخدرات مصاريفها على نفقة (صلاح).. لكنها نفقات غير مرئية ومش مشمولة بهيصة وزفة ودعاية.
وصلاح في مسيرته الكروية كل حركة أو كلمة أو موقف محسوبين عليه.
أنا كمشجع كروي أحب أتفرج على مو صلاح ليفربول عن محمد صلاح المنتخب، وكشخص مهتم بالرأي العام مش شايف إن موقف صلاح من القضية الفلسطينية كان هيهدم عكا ولا هيحرر القدس ولا هيقضي على الصهيونية وجرايمها من الكون.. هو في الآخر لعيب كورة مش منظر اجتماعي سياسي.
صحيح كنت أحب منه موقف أقوى زي ما كنت أتمناه من نجومنا في الملاعب زي تريزيجيه وزيزو وشيكابالا وعمر جابر وشريف إكرامي وأمام عاشور ومرموش وربيعة والشحات والونش وغيرهم.
لكن كله في الآخر بيراعي أكل عيشه وعلى حسب ما أتذكر أو وصل لمعلوماتي مفيش لعيب كورة إتمسك مثلا في وقفة رافع علم فلسطين ولا راح معبر رفح ولا حتى سمعنا أنه أتبرع لغزة.
وبعدين الناس اللي بتقارن صلاح بـ “لامين يامال” يقارنوا الأول بين موقف انجلترا من الصهاينة وقواعد الدوري هناك، وموقف أسبانيا من الحرب العالمية على غزة والنظام ماشي إزاي عند الأسبان.
لكن صلاح عمل حاجات تانية مهمة زي أنه رفع طموح وسعر اللاعب المصري وبقى عندنا ٢ لعيبة في أندية القمة في الدوري الانجليزي ولعيب في برشلونة.
صلاح لعب في إعدادات العقلية المصرية وخلى في براح قدام الحلم.. لما شاب من قرية بسيطة نجح وبقى أسطورة حقيقية عند الخواجات.
صلاح بيشوف حصاد نجاحه بعينه.. إحنا بنسمع عنه.. بيشوف قوة تأثيره محدش بيحكيله.. ودي حاجة خلته يخاف أنها تتهز.. فعاش حياته وهو عايز ينجح عشان يفضل باب الحلم مفتوح.
ويبقى قدوة وتعيش تجربته سنين أطول.. وعشان كده عنده قناعة أنه سنين عمره راحت عشان هو بيتعامل مع نجاحه في الاحتراف كرسالة ضيع فيها شبابه.
كونه بقى كسب ملايين وملايين.. فعادي حمو بيكا أغنى من محمد صلاح وعمر كمال عنده أسطول عربيات مشفناش صلاح راكبها، ومحمد رمضان نمبر وان بيقول أنه عمل المليار الأولاني من زمان.
بس محدش فيهم يجرأ يقول إنه لعب في إعداد الطموح عند الشباب.. ممكن لعبوا في حاجات تانية.
عن الكاتب
