د.مارينا ماهر
كسر مضاعف ونزع “طرحة” دكتورة.. الجهل والبلطجة لما ينهشوا في جسم الأطباء!
شوفوا الصورة دي كويس.. دي دكتورة أسنان، نزلت الصبح تخدم الناس في وحدة طبية حكومية، رجعت لبيتها بـ كسر مضاعف في الإيد والكتف، وإصابات خطيرة في الرقبة والرأس والظهر!
الجريمة دي حصلت في شبرا الخيمة.. البداية “خناقة وشتائم” من مرافقتين لمريضة، والموضوع اتطور لبلطجة مرعبة لما استدعوا رجالة نزلوا في الدكتورة ضرب بـ “قطع حديدية” وحطموا عيادتها.. والسبب؟ الدكتورة رمت الضروس المخلوعة في صندوق النفايات ورفضت تديهالهم!
التحفّز ضد الدكاترة.. شماعة الجهل والبلطجة!
للأسف، بقا عندنا حالة غريبة جداً في المجتمع؛ الناس بقى عندها تحفّز زايد وعداء أعمى ضد منظومة الأطباء كلها..
بسبب حوادث فردية بتنتشر على السوشيال ميديا، الناس بتعممها وتستغلها عشان تشحن النفوس ضد الدكاترة.
لكن ده أكبر غلط! والنتيجة المرعبة للتحفز ده بنشوفها النهاردة:
إنك تبرر لنفسك تعتدي على دكتورة (ست) آمنة في مكان شغلها، مش بس تضربها بالحديد وتكسر عضمها.. لأ، وكمان تنزع طرحتها وتهين كرامتها وشرفها المهني والإنساني! (وأنا مش هقدر أحط فيديو الواقعة هنا لبشاعة المنظر وصعوبة سحل الدكتورة بالحديد).
اعرف أكثر
هل كارثة طبيعية؟ فنزويلا في شلل تام بعد تعرضها لزلزالين كبيرين
أكيد مش كل الناس كده، بالعكس.. الشعب المصري طول عمره معروف بالأصل والشهامة، والراجل المصري الحقيقي لما بيشوف ست في ضيقة أو بيحصل معاها حاجة، أول حاجة بيعملها إنه بيصونها ويحميها ويقف في ظهرها! اللي حصل ده لا يمت لأصلنا ولا لشهامة أولاد البلد بصلة، دي تصرفات همجية دخيلة علينا. فين النخوة؟ وفين الأصول اللي كبرنا عليها؟
الدكتورة دي لسه حالا مخلصة المريضة من وجع، الوجع البشع اللي لولاها كان هيفضل مكمل ومطير النوم من عينيها! بدل ما تخرج تشكرها إنها ريحتها من العذاب.. تدير ضهرك وتسحلها وتنزع حجابها بالحديد؟!
الجهل لما يكسر دراع اللي بيحميه!
الصدمة إن الدكتورة لما رفضت تديهم الضروس، مكانتش بتعاند.. دي كانت بتطبق بروتوكول مكافحة العدوى. الضرس المخلوع ده قنبلة بيولوجية! بيبقى غرقان دم ولعاب ومحمل بفيروسات كبدية وبكتيريا نشطة.
اعرف أكثر
وزير الصحة يدعو النائب العام لإنقاذ طبيبة الأسنان التى اعتدوا عليها
بمنتهى البساطة: هو أنت لو روحت مستشفى وعملت عملية، بتاخد المشرط الملوث أو الشاش اللي مليان دم معاك البيت وتعتبره بتاعك؟
السنان المخلوعة بالظبط زيها زي أي عضو أو نسيج ملوث بيتشال من الجسم.. مكانها المحرقة مش جيب الجاكيت! الدكتورة رمتها في “صندوق النفايات الطبية” عشان تحمي المريضة وبيتها وعيالها من وباء وعدوى قاتلة.. فكان المقابل إنهم يهينوها ويكسروا دراعها!
كرامة الأطقم الطبية مش حيطة مايلة
النهاردة دكتورة أسنان، وامبارح صيدلي في صيدليته، وبكرة ممرض في استقبال مستشفى.. التحفز ده لو مأخدش وقفة حاسمة، الدكاترة مش هتعرف تعالجكم وهي خايفة على كرامتها وحياتها.
وبانتشار الأسلوب ده والسكون عليه، إحنا كده بنفتح الباب لخراب مجتمعي كامل؛ بكره كل حد معترض على أي حاجة أو مش عاجبه النظام، هيدخل بالحديد على موظف في مصلحة حكومية، أو على كاشير في سوبر ماركت، أو صاحب محل! مفيش مجتمع يقدر يعيش لو كل واحد قرر ياخد اللي هو فاكره حقه بدراعه وبالحديد.
اعرف أكثر
• المستشفى والعيادة مش “ساحة خناق” بالدراع. لو عندك شكوى، في قانون وفي إدارة.. لكن تمد إيدك بالحديد وتتعدى على حرمة دكتورة? دي بلطجة ملهاش أي عذر.
• الدكتور مش خادم، ده شخص قضى عمره في المذاكرة والتعب عشان يقف يريحك من ألمك، وله كامل الاحترام والهيبة في مكانه.
الاعتداء على الأطقم الطبية جريمة في حق المجتمع كله.. لأن الدكتور لو خاف وهو داخل عيادته، مش هيعرف يعالجك ولا هيأمن على نفسه وهو بيخدمك.
اعرف أكثر
كل التضامن مع دكتورة سارة عوض طبيبة شبرا الخيمة..
كرامة وأمن دكاترة مصر خط أحمر، ولازم وقفة حاسمة لإنهاء الشحن والتحفز الأعمى ضد جيش مصر الأبيض.
عن الكاتب
