في أول يوم من رمضان !
الشهر اللي المفروض القلوب فيه تهدى والنفوس تصفى، نلاقي مشهد صادم يوجع أي إنسان عنده قلب.
راجل ماشي و ف إيده طفل و مرعوب مستخبي في حضنه، و نلاقي سلاح مرفوع في وشهم بكل وحشية ودمويو !
مشهد يخلي السؤال يفرض نفسه: وصلنا لإيه؟ وإزاي بقى ده يحصل قدام الناس عادي؟
دي كارثة حقيقية !
لما المجرم يحس إن العقوبة ممكن تتاخد عادي ! و تعدي و يكمل طبيعي حيتمادى. ولما هيبة القانون تضعف في الشارع، الفكرة اللي وصلت للبعض أن اللي بيحكم مش القانون… اللي بيحكم كده العنف و البلطجة !
البلطجة مش خناقة شارع وخلاص، دي جريمة بتكسر إحساس الأمان جوه كل بيت
يعني إيه اللي أنا بقوله ؟
يعني راجل حيخاف ينزل من بيته لشغله و شاب حيخاف يروح جامعته !
يعني أب حيخاف على بنته وهي ماشية، وأم قلبها مش مطمّن وهي نازلة تشتري حاجة من تحت بيتها
الأمن هو أساس أي بلد عايزة تتقدم
المواطن اللي خايف جوه وطنه مش هيشتغل كويس، ولا هيبني، ولا حتي هيحلم.
السؤال اللي من حق كل الناس تسأله دلوقتي
ليه البلطجي مبقاش بيخاف؟
هل العقوبات الموجودة فعلاً بتردع؟
هل اللي بيروع الناس حاسس إن اللي مستنيه قد اللي بيعمله؟
أي مجتمع مش قادر يحمي نفسه و أطفاله في الشارع محتاج وقفة حاسمة !
وأي قانون مش بيردع المعتدي محتاج مراجعة قوانين .
طالعوا مقالات أخري للكاتبة
چولى ملك تسطر: السلطة وكيف تغيّر شكلها ومن يسيطر علي عقل الجمهور الآن ؟
چولى ملك تسطر: لماذا لعبوا في معايير الرجولة؟
بنطالب بقانون مصري عادل يخلي أي حد يفكر يرهب الناس يعيد حساباته ألف مرة.
الأمن مش كلام يتكتب على السوشيال ميديا.
الأمن مش شعارات ولا رفاهية ، الأمن حق كل مواطن مصري
أي حد يفكر يرفع سلاح في وش مواطن يبقى عارف إن الثمن هيبقى قاسي وحاسم بالقانون.
إحنا واثقين إن الدولة قادرة تحسم، وإن القانون يقدر يتطور عشان يواجه النوع ده من الجرائم.
الناس مش طالبة المستحيل… الناس عايزة تمشي في الشارع وهي مطمّنة.
الدول اللي قدرت تقلل العنف عملت كده عن طريق سرعة الفصل في القضايا و اشتغلت علي عقوبات حاسمة و نفذت القانون و كان الهدف في المقام الأول حماية حقيقية للمواطنين المنتمين لدولتهم
عايزين رسالة واضحة و حاسمة، أن اللي يرهب الناس، القانون مش هيرحمه.
والمجتمع ليه دور كمان
مش كل المسؤولية على الدولة بس
السكوت على البلطجة، أو تبريرها، أو اعتبارها “جدعنة” هو اللي بيخليها تكبر ، ثقافه الشعب محتاجة تعديل فين جدعنة أهل مصر اللي أتربينا عليها ؟ فين الشهامة و النخوة و حنية قلب المصريين علي بعض ؟
رمضان شهر الرحمة… آه.
بس الرحمة ما تنفعش مع اللي بيسرق أمان الناس.
* الكاتبة مصرية مقيمة بالولايات المتحدة
المقالات مساحات خاصة بكتابها، وليس بالتبعية أن تتوافق مع السياسة التحريرية للموقع
عن الكاتب
