وحدة تصحيف السوشيال ميديا
حالة غضب مجتمعية كبيرة، تضرب المصريين خلال الساعات الأخيرة مع الاهتمام المبالغ فيه بفرح البلوجر غريب الأطوار كروان على الشهير بكروان مشاكل، وحفيدة شعبان عبد الرحيم، والذى تحول لعدة حوداث تدخلت على إثرها الداخلية وألقت القبض عليه وعلى شقيقه وعدة أسماء بالحدث، بعد تطورات معقدة للسيطرة على الفوضي.
وعلق العديد من رواد السوشيال ميديا المصرية، فقال بدل ما يكون فرح، اتحول زفاف التيك توكر كروان مشاكل وحفيدة شعبان عبد الرحيم لحديث السوشيال ميديا بعد فوضى غير مسبوقة داخل القاعة.
واللي حصل تزاحم شديد، وحالات إغماء متكررة شملت كروان نفسه والعروس وعدد من المعازيم، وسط صراخ وتدافع خلى الليلة تخرج عن السيطرة وتتحول لأكتر الأفراح المثيرة للجدل.
الأمن وصل بعد خناقات بين البودي جارد وعدد من المعازيم، في محاولة للسيطرة على حالة الفوضى الشديدة داخل القاعة.
وقال آخر، فرح كروان مشاكل من حفيدة شعبولا كان مكانه “الفور سيسون شبرا الخيمة” ووجه دعوة لكل الناس.
حوار إن فيه فور سيزون مضروب في شبرا الخيمة ده أصلاً مش طبيعي.
– قبل الفرح بكام يوم عم العروسة ناشد الرئيس إنه يوقف الجوازة دي.. وناشد برضه وزير الداخلية لأن العريس ده لا يليق بعراقة العائلة بس شكلهم ماهتموش يعني.
– الفيرست لوك لكروان مشاكل كان فيه هدية الأيفون الجديد للعروسة..بعد ساعة الموبايل إتسرق منها في الفرح.
– موبايل كروان مشاكل نفسه إتسرق فى الفرح وهو داخل بسبب إن محبي كروان مشاكل كلهم تزاحموا.
– كروان مشاكل جاب جاردات .. اتحرشوا بالتيكتوكرز اللي هناك ومحبي كروان مشاكل اتحرشوا بالجاردات نفسهم.
– نجم نجوم الحفلة كان شبيه الفنان عبد الحليم حافظ.. وده اسمه العندليب الأبيض.. بعد ٣ دقايق من دخوله البنطلون وقع .. مش مبالغة، بعدها اغم عليه من التزاحم.
– وبعض الكائنات التيكتوكية كان ليها تواجد هناك وسط الفوضي، ومنهم واحد إسمه، محمد الزبال كان ليه ظهور مميز كنجم بالمناصفة مع ملك جمال الشرقية .. ودول كمان اتسرقوا.
وكمان شبيه جعفر العمدة اتضرب.. وسرقوا نضارته.
وأم العروسة اتحرشوا بيها هي والعروسة ووقعت ع الأرض وداسوا عليها وبقى فيه أثر نعل ف وشها زي فيلم بوحة كده.
والفرح كان تجمع الغوغاء و ومجتمع التيك توكرز الغريب والناس اللي عليها أحكام محدش عارف مين كان بيسرق مين.. بس يعني اللي كان بيتسرق كان بيحاول يروّح وهو سارق موبايل حد يعوض بيه خسارته.
ملحمة فوضوية ونفسية معقدة إتكتبت في الفور سيسون شبرا الخيمة.
– حصلت خناقة في الفرح زي خناقات أفلام الأبيض والأسود.. والكراسي طارت وإترمت على بعض.. والعريس ماعرفش يتنفس وقف فوق الكوشة وبقى يشتم فى الناس بعدها الجاردات حبسوه فى الحمام ساعة عشان الناس تمشي.
– خرجوا كروان بأعجوبة وسحلوا مراته.. حد قاله مفيش حل يا كروان إسحبها من شعرها.
– أبو العروسة مسك المايك وشتمهم شتايم قذرة.. شتم العريس وبنته كمان.
– كروان مشاكل طلع لايف وقال فرحي باظ.. فرحي باظ.
لم هدايا بأكتر من مليون جنيه.
– محدش عارف ليه.. بس محبي كروان مشاكل بشماريخ حرقوا عربية كروان مشاكل وسرقوا موبايلات عيلته كلها.
– الشرطة دخلت بقوات عشان تنهي المهزلة اللي اسمها الفرح ده.
– العندليب الأبيض تم تهريبه بأعجوبة باستخدام توك توك إنقاذ.. والله ما بهرج.
– شبيه الأندرتيكر تم التحرش بيه.. وللأسف بعدها بقى تيكر بس.
– فيه واحدة شكلها تيك توكر مهمة – للأسف مش عارفهم من بعض- طلعت لايف تقول فستاني ب ١٢ الف جنيه اتقطع ربنا يسامحك يا كروان…
أما “بالو يا ولدي” أعلن استياءه وعمل لايف قال فيه: “أنا لغيت ٣ إعلانات عشان أكيلك” وقال كلام تاني يبدو مهم بس للأسف مافهمتوش..
فيه واحد شكله عنده متابعين برضه طلع من الفرح بجزمة واحدة ونص جاكيت وفضل يشتم فى كروان.
أم جاسر قررت تتبرع بتمن الإزاز اللي اتكسر وعملت لايف طلعت من صدرها شئ ما كمساعدة لكروان.. وأنا برضه مش بقلش.
– فيه واحد غالبا شبيه دوناتيلو.. مسك العصاية بتاعة دوناتيلو فى القاعة وعمل فري ستايل كده على أساس محدش يقرب من منطقة نفوذه.. الفيديو اتقطع بس غالباً خد قفا عشوائي بعد ما خلص الشو.
– كروان طلع لايف يدعي ع الناس اللي هوا عزمهم.. جاله تاني هدايا بملايين كمان ف كلم أخوه في اللايف قاله ابعتلي kiss لو انت بتشوف اللايف.. ف واحد من الداعمين عمله هدية كده حولت وشه لدجاجة بتبيض.. ما علينا يعني.
– الشرطة راحت لكروان ف بيته قبضوا عليه.
(طلع قال ماتحبسش.. بس الأخبار بتقول أنه اتمسك فى حدايق القبة)
دي فيلم بلاك كوميدي كامل متكامل وعالم مختلف كلياً.
ووفق بيان وزارة الداخلية، ففى إطار كشف ملابسات مقاطع فيديو تم تداولها بمواقع التواصل الإجتماعى تضمنت تدافع عدد من المواطنين أمام إحدى قاعات الأفراح بالقليوبية أثناء مشاركتهم بحفل زفاف أحد صناع المحتوى والزعم بإشتعال النيران بسيارته.
بالفحص تبين أنه بتاريخ 29 الجارى وأثناء إقامة (صانع محتوى “له معلومات جنائية”) حفل زفافه بإحدى قاعات الأفراح بالقليوبية قام عدد من المواطنين بالتجمع لإلتقاط الصور معه بالقاعة مما أدى إلى تدافعهم ونتج عن ذلك حدوث بعض التلفيات بها..
تم ضبط عدد (12 شخص) من القائمين على إحداث التلفيات والتحرش بالفتيات ، وتم صرف المتواجدين بالقاعة دون حدوث ما يخل بالأمن.
كما تبين أن قاعة الأفراح المشار إليها “كائنة بدائرة قسم شرطة ثان شبرا الخيمة” تُدار بدون ترخيص، وتم ضبط مالكيها (4 أشخاص).
وتبين أن السيارة المشتعلة ملك شقيق صانع المحتوى (“له معلومات جنائية” – تم ضبطه)، وبمواجهته أقر بأنه أثناء استقلاله لسيارته صحبة أحد أصدقائه قام الأخير بإشعال قطعة ألعاب نارية داخل السيارة مما أدى إلى تطاير الشرز منها وإشتعالها “تم ضبطه”، وبمواجهته أقر بإرتكاب الواقعة على النحو المشار إليه.
عن الكاتب
