– حدوتة سياحية كارثية استرعت انتباهي
– إمبارح الصحافة العالمية نشرت حكاية عبثية جدا حصلت لسائحة فرنسية في الأقصر
– حكاية ماينفعش أبدا تعدي في وقت الناس بتولول حرفيا من قلة الدولار وآثاره
– محامية فرنسية إسمها “نتالي” كانت مسافرة من مطار الأقصر بعد رحلة سياحية في مصر
– جهاز الكشف بالأشعة رصد تمثال فرعوني، الست كانت اشترته بـ 250 يورو قبلها بيوم من محل هدايا في الفندق
– خبراء الجمارك قالوا أنه تمثال أثري عمره 4500 سنة !
– والنتيجة أن السائحة قضت 8 أيام كاملة في قسم الأقصر، وحكت أنها نامت في أوضة مساحتها 10 متر مربع مع 40 شخص، (اعتقد كانوا ستات)
– وفي الآخر طلع التمثال مجرد سوفونير اشترته من الفندق، مش قطعة أثرية
– طيب 8 أيام كاملة مرمية في قسم الأقصر بسبب موضوع كان ممكن يتحل في ساعة زمن والست تلحق طيارتها أصلا ترجع بلدها مبسوطة بدل ما تفضحنا في الصحافة العالمية !
– التفاصيل كلها مخيفة بجد :
خبراء الجمارك قالوا على سوفونير أنه تمثال عمره 4500 سنة !
– وكان ممكن الشرطة تتصل بالفندق وتعرف مصدر التمثال وتتأكد منه، وده اللي عمله رئيس النيابة بس بعد أيام طويلة؛ طلب من محل الهدايا عنوان الورشة اللي بيجيب منها التمثال ولقى نماذج منه مرصوصة عالرفوف
– كان ممكن الاتصالات دي تتم وحد يروح الورشة قبل ما الطيارة تطلع أصلا، لكن الكارثة مش كده وبس، حتى لما رئيس النيابة إكتشف أن الست بريئة أمر بوقف الاجراءات لكن لم يصدر قرار بالإفراج عن السائحة (ده بحسب المنشور في يورو نيوز وغيرها)
– واللي حل المشكلة تدخل السفير الفرنسي بنفسه عشان تسافر !!
– الست بتحكي أن المحامي اللي عينته النيابة ليها في البداية حاول يقنعها أنها مذنبة ولازم تعتذر للشرطة، مع إن المفروض يدافع عن مصالحها كمتهمة
– صاحب شركة السياحة الفرنسية إتدخل وقال إنهم قدروا يحسنوا ظروف احتجازها وصرح للو فيجارو أن مشكلة “نتالي” أن جهات ما هى اللي مسكت قضيتها، فمحدش قدر يتدخل، وأنهم مش بيراعوا الاعتبارات الاقتصادية وغيرها للموضوع، حسب كلامه
– يعني تمثال هدية يتباع ب 250 يورو أصلا وده نصب في حد ذاته، وبعدين خبراء الجمارك يفتكروه تمثال أثري، والست تترمي في ظروف غير آدمية، ولما نعرف أنها بريئة تترمي شوية كمان لحد ما السفير يتدخل !
– كام مسئول هنا غلط؟
– كام مسؤول مافكرش إن السياح دول أهم مصادر العملة الصعبة بعد انخفاض إيراد القناة وتحويلات المصريين في الخارج، وقبل كده بشر ليهم حقوق؟
– حاولت أدور على أي تعليق من أي مسؤول مصري يوضح اللي حصل مالقيتش !
– لكن لقيت الست “نتالي” بتقول للو فيجارو أنهم قالوا لها أنها ممنوعة من دخول مصر مدى الحياة !
– البلد بقت صعبة فعلا
ومن الضروري محاسبة ومعاقبة مفتشى الجمارك بمطار الأقصر بعد ثبوت الجهل لوردية الجمارك التى أساءت لتلك السائحة ، والتى قصت وروت حكايتها لوكالات الأنباء بسبب تصرف ومعاملة غير العارفين.
المقالات .. مساحات خاصة بالكتاب ، ليست بالضرورة تعبر عن آراء منصة وكالة الأنباء المصرية: إندكس
*مرفق مع المقال صور التمثال الأزمة في سبق صحفي خاص
عن الكاتب
الفاسدون والارهابيون والحمقي والجهله والاخوان وانهم جميعا اعداء مصر