غرفة الرصد السوشيالى
أثار الإعلامى أحمد موسي جدلا غير مبرر، ببوست له على منصة إكس ، حيث أعلن عن إلغاء قطع الكهرباء ليلا من الأربعاء ، علي أن يتم تخفيف الأحمال بين الساعة ١١ صباحا وحتي الساعة ٥ مساء ..واتخذ الدكتور مصطفي مدبولي رئيس مجلس الوزراء هذا القرار لمساعدة الطلاب علي المذاكرة والاستعداد لامتحانات منتصف العام.
كلمات موسي أثارت العديد من ردود التى كان من المهم متابعتها ورصدها لنقلها لكم، لتقدير قيمة الإعلامى وعلاقته بالرأى العام ورؤيته للأجواء المحيطة به، ونورد فيما يلى بعض من هذه الردود التى لاحقت موسي ولم يرد على أغلبها.
قال متابع لموسي:صباحا حتى ٥ مساء ده وقت الذروة في العمل. الشركات و المصانع اللي معتمدة على الكهرباء و الإنترنت تعمل إيه؟ لو الكهرباء قطعت ساعتين في يوم عمل ٨ ساعات، الإنتاجية كده هتقل في الشركات و المصانع المتأثرة بنسبة ٢٥٪!!! فين خطة الحكومة لتنفيذ وعدها بوقف قطع الكهرباء.
طالع بوست موسي في حسابه على منصة إكس
https://twitter.com/ahmeda_mousa/status/1742185951055470611?t=WSb1IeaQ2Lbr_OiO1MBcPw&s=19
وقال آخر: الكهربا مش إضاءة فقط انقطاع كهرباء يعني انقطاع المياه بدون الكهرباء المواتير مش هترفع مياه للشقق ده غير إفساد الأطعمة اللي في الثلاجات يعني شركة كهرباء خدمة ناقصة ومع ذلك بتعلوا علينا في فواتير على إيه مش عارف؟!
وقال ثالث: قوله يمشى اللاجئين اللى بياخدوا أكتر من ٣٠ % من استهلاك الكهربا إحنا كان عندنا اكتفاء ذاتى من الكهربا ومكنش عندنا أزمات السكر والبصل وغيره لغاية ما اللاجئين شرفوا.
قوله يرفع الإقامات عليهم ويمنع التربية والتعليم والتعليم العالى عنهم وياخد مقابل قصاده.
قوله برده يمنع التملك ليهم.
وقال رابع: إزاي و ده وقت ذروة و الطلاب شخصيا أصلا في المدارس هايمتحنوا ع ضوء الشمس!!والمصالح الحكومية و المصانع و البنوك و أي مكان شغال بسيستيم و كمبيوتر كم وقف حال ملوش حدود و خساير إنتاجية يومية..مين هايتحمل كل الخساير دي معلش؟!
وقال خامس: طبعا بعد الامتحانات ترجع تاني زي الانتخابات كده
وقال سادس: كان متوقع إلغاء تخفيف الأحمال تماما .ده إحنا فى الشتاء .قطع الكهرباء بيأثر على كل شئ .
وقال سابع: وللأسف كانوا محددين وقت ثابت للقطع فكنا بنتحاشى المصعد دلوقت مفيش وقت ثابت بمزاجهم و كل شوية ناس محبوسة فى الأسانسير
وقال ثامن: كان انقطاع التيار مساء أفضل علي الأقل الناس أغلبها نائم إنما في التوقيت ده اللي بيطلع أسانسيرات ومذاكرة ح يكون موعد سئ جدا
وقال تاسع :مش ناويين يلغو قطع الكهربا يا أستاذ أحمد و لا إحنا هنتعايش مع الموضوع دا علطول.
وقال سيدة : بما أنك اشتغلت فى وزارة الكهربا ممكن تقول لدكتور مصطفى إننا فى التوقيت ده بنكون راجعين من الشغل وممكن نتحبس فى الأسانسير ولو وصلنا بالسلامة للشقة عاوزين نطبخ للعيال اللى بيتنيلو يذاكرو ونغسل المواعين ولو الكهربا قاطعة المية بالتالى بتقطع وموال كبير أوى سعادتك
وقال حادى عشر: قطع الكهرباء ده مفيش فيه خسارة كبيرة للاقتصاد وخاصة توقيتات العمل في جميع المصالح والمصانع.. وهل له جدوى اقتصادية تستحق تلك الخسارة؟
كلام في غاية الأهمية والخطورة والمعقولية، وحاول رئيس الوزراء الرد علي الانتقادات التى وجهت كلها في هذا الإطار فقط بالتبريرات، على طريقة قلة الحيلة ، معترفا إنه يراجع خبراء الاقتصاد، إذا اين هما من حكومته، حيث المجموعة الاقتصادية التى لا تؤدى بالشكل المرضي ، والأرقام والواقع كافي.
عن الكاتب
