طوال فترة الستينات كان والدي الله يرحمه مدير معهد بحوث الصحراء.
المعهد كان له محطات بحوث في كل محافظات مصر… و منها محافظة مطروح.
كل سنة في آخر أسبوع من شهر يوليو كان والدي يصحبنا إحنا الأسرة و جدتي و أصدقائنا لنزور الساحل الغربي للإسكندرية و نتفرج علي محطات الزراعة من أول برج العرب حتي مطروح….المحطات دي تم فيها تطوير زراعة البيكان لأول مرة في مصر و الجوجوبا و الزيتون و الخروع و العنب …
محطات تجارب كانت أساس لنهضة الزراعة المصرية الصحراوية.
و بعد إنتهاء الجولة العلمية كنا نمضي عدة أيام في رأس الحكمة…
ليه رأس الحكمة؟
لأن رأس الحكمة منطقة منتهي الجمال و جنة الله علي أرضه كما كان يقول والدي و هي عبارة عن لسان قاعدته علي الطريق الساحلي و أول ما تبتدي تدخل باتجاه البحر تكون الأرض بترتفع لتصل لقمة الجبل. علي هذه القمة توجد استراحة الملك فاروق لأن هذه البقعة كانت مفضلة بالنسبة له…
مش قادرة أوصف جمال المنظر من فوق الجبل و من ترأس الاستراحة المصممة علي الطراز الإيطالي الفخمة…
و علشان الصورة تتضح لحضراتكم أوصف لكم الاستراحة…
هي مبني مستطيل مساحته حوالي ٢٥٠ م٢…
من الداخل فيها مكان معيشة متسع و به دفاية fireplace بتصميم جميل .
و بالاستراحة أربعة حجرات نوم منها واحدة أساسية و ثلاث حجرات للأميرات .
الاستراحة بها عدد ٢ حمام كلها من الرخام الإيطالي الأبيض الكرارة و النواكل حاجة فاخرة جدا….
أما الفرش الملكي كله فلم يكن موجودا…!!!!
يدوبك كنب بسيط و حجرات نوم إيديال حاجة كده غير ملكية خالص…
علشان ننزل البحر كان لازم ننزل نجري علي سفح الجبل للأسفل.
أول ما توصل لمستوي البحر يبقي قدامك مكانين… الأول هو خليج رأس الحكمة البديع في لونه و رمله و بحره….
و علي إيدك الشمال خليج صغير شبه مغلق قالوا لنا أن اسمه بحيرة الأميرات لأن الأميرات كانت بتعوم فيه حيث أن المية دافئة طول السنة… حاجة كده من الخيال و إحنا كأطفال كنا ساعات نعوم فيه… و فعلا دافي جدا…
و طبعا عايزة أقولكم أننا كنا وحدنا المصيفين فقط في هذا المكان….
لكن لأن جمال عبد الناصر عجبه المكان كمان، بني لنفسه استراحة و لكنها كانت قريبة من مستوي البحر..
لما جه السادات للحكم وجد أن مكان استراحة الملك موقعها اجمل فاستردها ليقيم فيها…
معرفش أيام مبارك حصل إيه الاستراحة بس سمعت أنه كان بيروح راس الحكمة…. مش عارفة كان بيقيم فين…
دي نبذة سريعة عن رأس الحكمة…و السؤال هو إيه اللي ح يحصل لإستراحة الملك و إستراحة عبد الناصر؟
المهم لما كنا نقول لجدي إننا نروح رأس الحكمة ، كان يردد الاية : رأس الحكمة مخافة الله ( سفر الأمثال العهد القديم)…
أنا كنت اسمعها و أخاف شوية… و مكنتش فاهمة معناها….
لحد ما كبرت و فهمت أن الحكيم هو من يخاف ربه….
عن الكاتب
