محمد علام
🔴 النهارده حصلت في العالم أحداث تاريخية..6 جنود وضباط اسرائيليين اتقتلوا باستهداف مباشر ف أماكن مختلفة.. وأمريكا صوتت بالفيتو ضد العالم كله برفض قرار وقف إطلاق النار في غزة، وسمحت باستمرار الإبادة!
وبعدها مباشرةً باكستان في تصريحات رسمية طلبت إنشاء “ناتو إسلامي” لحماية المصالح الإسلامية، ومصر وتركيا أعلنوا عن تعاون ومناورات عسكرية مشتركة مع بعض لأول مرة، والصين أصدرت بتصريحات رسمية مفاجأة وغير مسبوقة بإن جيشها جاهز للتوسع في العالم كله!
⚫️ ال 24 ساعة اللي فاتوا دول حصلت فيهم تطورات كتير مهمة، ممكن لو بصيتلها من بعيد تفتكرها متفرقة.. بس الحقيقة أن في خيط كبير بيربط ما بينهم كلهم، والخيط ده لو فهمته هتقدر تستوعب ان العالم فعليًا بيتغير قدام عيونك دلوقتي وأنت بتقرأ السطور دي… والتغير ده ممكن يبقى معناه أخطر مما تتصور…
🔹️ تعالى أشرحلك القصة كلها من البداية، وخلينا ناخدها مع بعض واحدة واحدة…
🔴 شوف يا سيدي…
🟢 أول حاجة حصلت النهارده، هي ان في أربع جنود إسرائيليين اتقتلوا في رفح بتفجير ضخم دمّر مدرعة هامر بالكامل…
التفجير ده حصل بسبب عبوة ناسفة إتزرعت في طريق المدرعة، وانفجرت فيهم أثناء ما هما كانوا معديين في مهمة روتينية رايحين يأمنوا منطقة في القطاع أو ينسفوا مبنى أو أي حاجة من الحاجات الأخلاقية بتاعتهم😀… وبمجرد ما المدرعة انفجرت وانتشرت ليها صور وهي محروقة بالكامل، وبدأ الاحتلال يبعت طيارات إجلاء وفرق طبية، اتمنع النشر عن الموضوع…
🔹️ والموضوع موقفش هنا…
🟠 بعدها بساعات، على الحدود الأردنية–الفلسطينية، حصلت عملية تانية غير مسبوقة… مواطن أردني كان داخل بشاحنة على معبر الكرامة ما بين فلسطين والأردن، وفجأة وبدون مقدمات فتح النار على الجنود الإسرائيليين اللي واقفين يحرسوا ويفتشوا الشاحنات…
🟢 الرصاص اللي أطلقه نتج عنه أنه قتل جنديين، وجرح عدد من الجنود… بس الراجل كان عاقد العزم على تحقيق أكبر ضرر ممكن، ولما الذخيرة بتاعته خلصت، طلع سلاح أبيض وطعن واحد تاني من الجنود وقتله قبل ما يستشهد بعدها برصاص الاحتلال…
العملية دي بالذات عاملة قلبان في الإعلام الإسرائيلي، قريب من القلبان اللي حصل وقت ما المجند المصري محمد صلاح دخل بردو من الحدود وقتل وأصاب ست جنود إسرائيليين..
🟡 تكرار نفس الهجمة تقريبًا هو عبارة عن صفعة قوية على وش المنظومة الأمنية الإسرائيلية كلها، خصوصًا إنها حصلت في نقطة المفروض إنها من أأمن وأشد المواقع حراسة عندهم، ومن مواطن عادي مش عسكري ولا مدرب!
🟣 بس المهم بقى أنه أثناء ما كل ده بيحصل، كان مجلس الأمن النهارده مجتمع عشان يناقش قرار وقف إطلاق النار في غزة اللي تم تمريره بالأغلبية الساحقة من كام يوم…
وفي اللحظة اللي جه فيها وقت التصويت على القرار عشان يدخل حيز التنفيذ، 14 دولة كاملين صوتوا مع القرار، لكن أمريكا لوحدها هي اللي قالت لأ!
⚫️ بسبب الفيتو الأمريكي، القرار وقع واتلغى… ومن ساعتها وسائل الإعلام كلها مقلوبة ضد واشنطن، عشان العالم كله دلوقتي شافها وهي بترفض قرار لوقف عملية إبادة جماعية، ومبقاش في مجال للكذب ولا التبرير خلاص…
أمريكا دلوقتي أصبحت واقفة في وش العالم كله عشان تحمي الاحتلال وتمكنه من مواصلة ارتكاب الجرائم بتاعته علنًا وبدون تجميل ولا تذويق… ودي أول مرة تبقى حاصلة بالوضوح السافر ده، عشان شعوب الغرب تعرف حقيقتهم أيه…
🔴 وبالفعل روسيا بعدها استغلت الموقف وطلعت بتصريحات رسمية قالت إن الفيتو الأمريكي ده هو العائق الوحيد أمام وقف اطلاق النار في القطاع، وإن أمريكا هي سبب المشكلة.. وطبعًا (برغم إنهم يستغلوا الموقف لتحقيق بونط سياسي) إلا أنهم معاهم حق جدًا والعالم كله أصبح شايف ده دلوقتي بوضوح ومحدش بقى عارف يكذبه…
🔹️وعشان كده، فاللي حصل بعدها هو أن باكستان بعدها قالت تصريح مفاجيء وصادم للكل…
🟡 وزير الدفاع الباكستاني طلع بعد انتهاء التصويت ورفض القرار مباشرة، وقالها صراحة وبالنص كده: “ندعو إلى إنشاء حلف “ناتو إسلامي” يحمي مصالحنا وشعوبنا”…
ولو أنت فاكر أن ده مجرد كلام زي كل مرة، ف خليني أقولك أن الموضوع المرة دي شكله فيه اجراءات حقيقية فعلًا، ومش مجرد تصريحات وخلاص..عشان امبارح باكستان وقعت على اتفاقية دفاع مشترك بالفعل مع السعودية قلبت الدنيا.
🟠 وكمان النهارده بعد تصريح باكستان ده، حصل خطوة تانية تاريخية وغير مسبوقة على طريق التعاون العسكري ما بين الدول الإسلامية…
🔴 الحاجة دي هي إن مصر وتركيا أعلنوا أخيرًا انهم هيعملوا مناورات بحرية عسكرية ضخمة نهاية الشهر ده، لأول مرة من 13 سنة!
المناورات دي اسمها بحر الصداقة، وهي عبارة عن تدريبات عسكرية بحرية مشتركة ما بين مصر وتركيا بدأت سنة 2009 في مياه البحر المتوسط، وكانت مستمرة سنويًا لحد ما توقفت سنة 2013 بسبب الصدام اللي حصل بين مصر وتركيا..
🟣 يعني عدو الأمس أصبح النهارده بينبذ الخلاف والعداوة، وبيتحول لشريك… والمصالح ابتدت تتفق ويحصل تعاون عسكري حقيقي لتكوين تكتلات ضد التوسع الإسرائيلي اللي بيتم بمساعدة أمريكا…مش مجرد كلام وتصريحات!
🔵 ولما تحط كل ده بقى جنب اللي قاله وزير الدفاع الصيني من شوية، هتلاقي إن المشهد بقى أكبر بكتير…
🔹️ طب قال إيه وزير الدفاع الصيني؟! 👇
من شوية كان في منتدى أمنى شغال في بكين اسمه “شيانجشان”… وفي وسط المؤتمر ده، وزير الدفاع الصيني “دونج جون” طلع وألقى كلمة مهمة وخطيرة جدًا، وأول مرة الصين تقولها بالشكل ده؛ مفادها إن “الجيش الصيني مستعد الآن للعمل كقوة عالمية من أجل السلام والاستقرار”…
🟢 طب يعني إيه الكلام ده؟!
يعني الصين دلوقتي من بعد العرض العسكري الأخير المبهر اللي عملته من أيام، واللي كشفت فيه عن أسلحة متطورة غير موجودة في العالم كله، وعملت صدمة لأمريكا والغرب، وبعد ما سلحت دول كتير في حروبها ضد قوى غربية كبرى، زي ما سلحت باكستان ضد الهند، وبتسلح إيران حاليًا؛ جاية دلوقتي بتعلن إنها مستعدة تتوسع بجيشها في العالم كله عشان تحافظ على السلام…
🔴 وده طبعًا بيتصادم بشكل مباشر مع الدولة التانية اللي بالفعل بتقولك أنها ناشرة جيشها في العالم عشان تحقق السلام…اللي هي مين؟!
أمريكا طبعًا…
⚫️ الصين دلوقتي باختصار بتبعت رسالة لأمريكا يتقولها فيها يا إما تقبلوا بالنظام العالمي الجديد متعدد الأقطاب، وتتخلوا عن سيطرتكم على العالم، يا إما البديل هيكون الصدام المباشر…
العالم دلوقتي يا صديقي بيتغير بشكل غير مسبوق ومشفناش زيه قبل كده في السنين اللي عشناها على وجه الكوكب…
🟡 إحنا حاليًا بنعيش لحظة الانتقال من نظام عالمي إتبنى من بعد الحرب العالمية التانية وسيطرت فيه أمريكا، لنظام جديد متعدد الأقطاب بيتشكل قدام عيوننا…وممكن جدًا اللي بنعيشه دلوقتي يتكتب في كتب التاريخ بعد سنين بعنوان: “بداية النهاية للهيمنة الأمريكية”…
🔹️ فهل يا ترى الانتقال ده هيحصل بسلام والدنيا هتعدي بسهولة؟! ولا هيتكرر اللي حصل في التاريخ قبل كده في كل مرة كانت فيها امبراطورية بتسقط ونظام تاني بيتولد؟!
الله وحده أعلم…
عن الكاتب
