وحدة تعليم إندكس/أحمد حافظ
بمناسبة فيديو الأم اللي قلبت الدنيا النهاردة وهي بتصرخ لوزير التعليم إنه يرفع الغياب في المدارس عن ولادها .. علشان ولادها مش لاقيين ياكلوا ومش معاها فلوس تودي ولادها المدرسة وبتشحت.. وتقريبا معظم الناس تعاطفت معاها ونايمين متنكدين بسبب حزنهم على عيالها اللي مش لاقيين أكل ولا عارفين يتعلموا ولا يروحوا مدارس.
الصور المرفقة بهذه المادة .. من صفحة نفس الأم على تيك توك.. عاملة صفحة على تيك توك بتنشر فيها فيديوهات.. ضحك وهزار ورقص على أغاني..
وبتطلع لايف كل يوم بالليل تسهر مع المتابعين بتوعها.. لبسها معقول بيتها معقول.. وبتعمل فيديوهات مع ولادها وبتستقبل هدايا (فلوس يعني) من المتابعين في اللايف بتاعها.
كلامي لا يعني أبدًا.. إني بقول مفيش ناس تعبانة وظروفها صعبة.. ولا إن مصروفات التعليم مش مرهقة لشريحة كبيرة.. خاصة اللي عندهم ولدين وتلاتة وأربعة.. ربنا معاهم ويعينهم.
واللي يقول عكس كدة يبقى لا عنده قلب ولا رحمة.. بس الفقير عزيز الناس.. ومهما كانت ظروفه مش بيمد إيده.. والفقير الجديد في ظل الظروف الحالية عنده كرامة.
البوست بتاعي ده ردا على الأم صاحبة الفيديو.. انتي لم تقدرى كرامة ونفسية ومشاعر ولادك ونظرة زملائهم ليهم.. وعندك قدرة غير طبيعية على التمثيل والمتاجرة الرخيصة بمشاعر الناس.. قديرة في الصعبانيات.. وخليتي ناس كتير تشك في نوايا كل واحد ممكن تكون ظروفه صعبة وبيطلب مساعدة.
عايزة تصرفي على ولادك.. وفري فلوس باقة النت اللي بتستخدميه كل يوم بالساعات في اللايفات.. عايزة تصرفي على ولادك قدمي محتوى هادف محترم طالما عندك صفحة وليكي متابعين.. بدون رخص وابتزاز ومتاجرة بعاطفة الناس..
وملحوظة: في الصورة اللي تحت فيديو: ارفع الغياب يا وزير التعليم عيالي مش لاقيين ياكلوا هو اللي عامل عندها ٢ مليون مشاهدة.
كان لازم أكشف حقيقتك.. لأني ضد أي متاجرة بمعاناة البسطاء اللي عزة نفوسهم عفيفة وشريفة..ويحسبونهم أغنياء من التعفف.
عن الكاتب
