تعلم/إندكس ووحدة الرصد السوشيالى والإلكترونيى
انتشر مؤخرًا مفهوم الهوم سكولينج أو التعليم المرن ودا نتيجة سعي الأهل لتعليم أطفالهم تعليم سليم يكسبهم المعرفة اللازمة بالعلوم المختلفة.
أبرز 10 مدارس هوم سكولينج تقدر تقدم فيهم لابنك. مفهوم الهوم سكولينج الهوم سكولينج هو نظام موازي للتعليم الحكومي يعتمد في الأساس على التعلم خارج البيئة المدرسية التقليدية
ويكون المعلم في أغلب الأحيان هي الأم أو الأب، أو ممكن بتوفير مدرسين متخصصين. وبنلاقي إن في مدارس تبنت الفكرة دي وبقى اسمها “مدارس هوم سكولينج”،
وبدأت تقدم خدمات تعليمية مخصصة للطلاب اللي بيتبعوا النهج دا. المدارس دي ليها مميزات كتيرة زي عدم ضرورة ذهاب الطفل للمدرسة يوميًا واللي يعد حاجة كويسة، وبتلاقي إن حوالي 7.3% من أولياء الأمور بيفضلوا الهوم سكولينج لأولادهم، لإنه بيساعد على تلبية احتياجاتهم الخاصة.
ولكن على الجانب الآخر دا ممكن يأثر بالسلب على الطفل في جانب الذكاء الاجتماعي، وعلاقاته الاجتماعية مع الناس، وتعامله، فتقل رغبته في المشاركة المجتمعية، والاحتكاك بغيره. ودا السبب اللي بيخلي كتير من التربويين وعلماء النفس يهاجموا النظام، لإن التربية مش بتعتمد على تعلم العلوم وفهمها وبعض المهارات، لكن مهم كمان الطفل يتعلم بالاختلاط بالناس تجارب حياتية مختلفة.
وممكن يحل الأهل المشكلة دي بمحاولة تشجيع طفلهم على ممارسة أنشطة اجتماعية مختلفة زي لعب رياضة جماعية أو ممارسة هواية معينة أو تخصيص وقت للاجتماعات العائلية والأصحاب كمحاولة لتعويض وتوفير تجربة اجتماعية للطفل،
وبالتالي يحصل التوازن المطلوب. بالإضافة إلى إن مناهج التعليم المنزلي بتتحدد بناء على اللي بيناسب قدراته واهتماماته، وبتدرس بطرق تفاعلية يقدر يستمتع بيها الطفل، والاختبارات بتتم لمجرد معرفة مستوى الطفل بشكل عام، ومش بتعتبر مقياس لمهارات الطفل وقدراته. كمان من المميزات إن الطفل بيتعلم بعيد عن الحفظ والتلقين، لإن التعليم بيعتمد على الفهم والابتكار، وزرع أساسيات التفكير السليم في الطفل بحيث يقدر يعتمد على نفسه.
بما إن نظام مدارس الهوم سكولينج غير معتمد كنظام رسمي من وزارة التربية والتعليم ومفيش شهادة رسمية هيحصل عليها الطالب، فبالتالي مفيش مدارس رسمية معتمدة من وزارة التربية والتعليم، وكل اللي متاح بيكون عبارة عن أكاديميات تعليم بتشرح للأطفال مناهج التعليم بطرق حديثة ومبتكرة.
في عدد من الأكاديميات وصفحات على مواقع التواصل الاجتماعي بتقدم استشارات ونصائح للأهل، بالإضافة لوجود مجموعات الأمهات والآباء بيتشاركوا مع بعض الخبرات. وكذلك المدارس الدولية استحدثت نظام للتعليم عن بعد أو ما يعرف بـ الهوم سكولينج واللي بيتيح للطلاب المقيدين بيها الحصول على دورات معتمدة بما إنها مش بتخضع بشكل مباشر لقوانين الحكومة المصرية ولكن للجهات المانحة.
بالتالي بتعتمد من الجهة التابعة ليها في الخارج. أبرز مدارس هوم سكولينج في مصر بتتنوع خيارات مدارس الهوم سكولينج المتاحة للطالب، وعلى حسب المنطقة اللي بيسكن فيها بتختلف المدرسة، وبتختلف الخدمات التعليمية اللي بتقدمها، ومن أبرز المدارس دي:
1- مدرسة Creative Kids Languages School هي واحدة من مدارس هوم سكولينج في مدينة نصر، وفيها 3 مراحل: مرحلة الحضانة أو Preschool من سن سنتين ونصف إلى 3 ونصف مرحلة الـ Kindergarten) KG) من سن 3 سنوات ونصف إلى سن 5 سنوات ونصف مرحلة الابتدائي والإعدادي المكان مرخص، والمدرسين مؤهلين للتعامل وتعليم الأطفال بطرق حديثة تتناسب مع سنهم ومهاراتهم، والفصول مهيأة للعملية التعليمية.
كل فصل لا يزيد عن 114 طالب عشان تتم العملية التعليمية بسهولة، ويقدر الطالب ياخد فرصته كاملة في التعلم، والسؤال، والتفاعل، والمتابعة من خلال تقييمات دورية لمستواه. العنوان: شارع حسن الليثي الزعفراني متفرع من ذاكر حسين – الحي السابع – مدينة نصر آخر شارع الطيران.
2- مدرسة Lead steps nursery and home schooling أحد الخيارات المتاحة بعد البحث عن هوم سكولينج في حدائق الأهرام هي Lead Step، واللي بتهتم بجوانب الطفل العلمية والرياضية والفنية والدينية. والدراسة متاحة بداية من كي جي 1 لحد 3 إعدادي، وبمناهج دولية معتمدة، وطرق تدريس حديثة، واستراتيجية تعلم فعالة، ومتاح الدراسة باللغة العربية أو لغة أجنبية. كثافة الفصول الدراسية بتتراوح بين 7 لـ 10 طلاب، والمدرسة بتحرص على عقد اجتماعات مع أولياء الأمور ودورات تدريبة على المناهج الإضافية. العنوان: 92 ط أمام اكسيبشن – حدائق الأهرام
3- مدرسة SoloMind Academy homeschooling هي واحدة من مدارس هوم سكولينج العبور، بتعتمد على مناهج أمريكية بالإضافة إلى المناهج المحلية.
وكمان بتوفر للطلبة أنشطة تعليمية في مجالات مختلفة زي: البرمجة، والتصميم، وتعلم اللغات على إيد خبراء، وغيرها من الحاجات المهمة اللي بتفتح أفاق الطالب. وهنا الطفل هيتعلم، ويمارس بنفسه بأساليب مبتكرة، وطرق تناسبه وتناسب طريقته في تلقي المعلومة بالاعتماد على التفاعل بينه وبين المعلم. العنوان: مدينة العبور – الحي الثاني – شارع الشعراوي – ميدان الشروق
4- مدرسة Learning Trees Academies هي واحدة من مدارس هوم سكولينج اللي بتوفر مناهج خاصة لبناء شخصية الطفل، وتنمية مهاراته زي: تعليم القرآن، والبرمجة، والفن، والآداب العامة، وغيرها. بنلاقي إن عدد الأطفال في الفصول قليل، وبتتنوع طرق الشرح عشان تناسب مع كل طفل.
كمان طريقة التعليم بتسمح للطفل يستمتع بوقته يتعلم في نفس الوقت، وبتسيب ليه وقت حر بدون ضغوطات. العنوان: الحي الأول المجاورة الثانية – شارع عباد الرحمن رقم 252.
5- مدرسة ثمار الدولية للتعليم المنزلي بتتميز مدرسة ثمار الدولية عن غيرها من مدارس هوم سكولينج في أكتوبر بأسس التعليم القائمة على القيم الإسلامية بهدف تعليم الأطفال اللغة العربية والإنجليزية بأساس شرعي قوي مع حفظ الطفل للقرآن الكريم.
عدد الأطفال في الفصل لا يتجاوز 15 طفل مع تجهيزها بأحدث التقنيات وكاميرات المراقبة، وبتتنوع برامج التعليم المتاحة فيها، فبتشمل كافة الجوانب اللي بيحتاجها الطفل سواء في الجانب الشرعي أو جانب العلوم المختلفة أو اللغات أو المهارات وبناء الشخصية. العنوان: المجاورة 12 – بلوك 15/10 – فيلا 5 أمام مسجد المرشد من مدخل غرب سوميد – 6 أكتوبر – الجيزة
6- مدرسة Namaa Homeschooling Academy أحد مدارس هوم سكولينج في مدينة نصر، واللي بتتميز بوجود استشاريين ومعلمين أصحاب خبرة في أحدث طرق واستراتيجيات التعلم، وبناء الشخصية فكريًٍا ومهاريًا وأخلاقيًا، بالإضافة إلى وجود أخصائي نفسي لمتابعة الحالة النفسية للطلاب. كذلك المدرسة بتوفر خدمة تأهيل الطالب لجميع الامتحانات الدولية، وبتهدف للريادة في قطاع التعليم، والتأثير بشكل إيجابي وفعال، وإحداث تغيير حقيقي. العنوان: مدينة نصر – خلف الحديقة الدولية.
7- مدرسة Knowledge Universe Academy بتوفر المدرسة تعليم أونلاين أو تعليم بحضور الطفل للمكان، وبتتم عملية الطفل بناءً على شخصية الطفل وقدراته، عشان يقدر يستفاد بشكل أكبر في الحاضر
وكمان في المستقبل. وبتدمج ما بين المرح والتعليم، عشان الطفل يتقبل المعلومات، ويقدر يستفيد منها، بجانب إنها بتعتمد على الأنشطة التفاعلية. العنوان: الجيزة – قسم أول 6 أكتوبر – 133 المشير أحمد بدوي
8- مدرسة وحضانة ابن سينا من مدارس هوم سكولينج في أكتوبر هي مدرسة وحضانة ابن سينا اللي بتسعى لبناء جيل قادر على مواجهة الصعوبات من خلال تعلميهم بطرق حديثة ومبتكرة، وكذلك تعليم طرق التفكير بدون إهمال جانب الأخلاق. كمان بيتم تفعيل التعليم التفاعلي والأنشطة المختلفة لإيصال المعلومة للطفل بطريقة صحيحة تناسب سنه، وطريقة تفكيره، وتلقيه للمعلومة. العنوان: الجيزة – قسم أول 6 أكتوبر – شارع النباتات
9- أكاديمية معًا أكاديمية معًا هي بديل للتعليم المدرسي التقليدي للأطفال من كي جي 1 وحتى الابتدائي، وبتوفر التعليم باللغة العربية واللغات بهدف الاستغناء بالأكاديمية عن الدروس، وبتوفر تعليم مناسب لبناء الطفل في الجوانب المختلفة، بالإضافة لزرع القيم والأخلاق الحسنة في نفوس الأطفال. الكثافة العددية للطلاب في الفصول قليلة، عشان الطفل يتوفر له بيئة تعليمية وأخلاقية مناسبة. العنوان: الحى الخامس عقد ثانى مجاورة سادسه شارع ٣٢ – فيلا رقم167 – 6 أكتوبر – الجيزة
10- مدرسة Fun Home Nursery & Academy هي واحدة من مدارس هوم سكولينج في أكتوبر، واللي بتتمتع بنظام تعليم يبني أساسيات قوية للطفل تفيده في حاضره ومستقبله. وعملية التعليم فيها بتتم بناءً على أطر تعليم حديثة، وبتعتمد على الأنشطة المختلفة في التعليم زي: استخدام الفنون، والتعلم القائم على المشاريع، وغيرها من أساليب التعلم المتطورة، واللي بتوفر للطفل التعلم والمرح، وبتساعد في تطوير مهاراته الحياتية في المراحل المبكرة من عمره. العنوان: قرية المختار محور الكفراوي بجوار المرور – 6 أكتوبر – الجيزة
مصاريف الالتحاق بمدرسة الهوم سكولينج لا يمكن تحديد قيمة ثابتة لمصاريف نظام مدارس هوم سكولينج لإنه بيختلف بحسب اختلاف المرحلة العمرية، وتحديد مين اللي هيكون معلم الطفل؛ أحد الأبوين، ولا هيتم الاستعانة بمعلم في بعض المواد، أو أكاديمية متخصصة. وبناءً عليه ممكن تصل التكلفة في بعض الأماكن اللي هتتكفل بتعليم الطفل بالاعتماد على نظام التعليم المرن واعتبارها مدرسة هوم سكولينج إلى 30 ألف جنيه.
بالإضافة لتكلفة تسجيل واستخراج الشهادة الرسمية في مدرسة نظامية معتمدة من وزارة التربية والتعليم. بجانب مصاريف بعض الأدوات -لو المنهج بيعتمد على منتسوري-، واللي بتكون تكلفتها مش بسيطة ومش متاحة لكل الأسر. وبيظهر على الجانب الآخر أحد أكبر العيوب واللي بتتمثل في تحول الهوم سكولينج من تعليم بديل سهل لبيزنس تنافسي في الربح.
وبكدا يصبح نظام تعليم هدفه ربحية بتهلك جيب الأهالي. بس الرغم من إن الأهالي ممكن تدفع مبالغ طائلة قد تصل إلى 50 ألف جنيه إلا إن دا بيعتبر لكثير منهم خيار أفضل لتجنب تعرض الطفل للضغط في المدارس وبدون نتيجة مرجوة. الخلاصة ظهر في الفترة الأخيرة العديد من مدارس الهوم سكولينج في مصر اللي بتهدف لتوفير بديل للتعليم التقليدي.
ومن أبرزها: مدرسة Creative Kids Languages School، مدرسة Lead steps nursery and home schooling، ومدرسة SoloMind Academy homeschooling، وغيرهم زي ما ذكرنا. ولإن كل نظام تعليمي بيكون ليه مميزات وعيوب، فدورك كولي أمر إنك تدرس سلبيات وإيجابيات النظام دا كويس جدًا، وتعرف مدى حاجة الطفل ليه، وقدرته على التعليم بالطريقة دي، وكمان تحدد المقدرة المادية، وبناءً على دا هتقدر تقرر إذا كان مناسب ليك ولطفلك ولا لأ.
عن الكاتب
