وحدة تصحيف السوشيال ميديا وقسم الفن والسينما
رصد فريق تصحيف السوشيال ميديا ، قصة نفصل بها عن المواد الثقيلة والاستراتيجية والعسكرية والسياسية والجرائم المعقدة، التى يموج بها موقعنا، ويهمنا رأيكم فيها، وفي أسلوبها.
القصة تتعرض لصدارة فنانات باللون الأسمر في الصدارة بشكل واضح خلال الفترة الأخيرة، فهل تنوع مفهوم الجمال والجاذبية في المجتمع المصري من وجهة نظركم، والآن مع استعراض النماذج.
روبي..البنت السمرة اللي أثبتت للعالم إن الجمال مش باللون الأبيض ولا الشعر الأصفر، وإن السمار فعلاً نص الجمال، والكلام ده بيحصل عمليًّا من ساعة ما طلعت في حفلاتها وهي بترقص وبتدلع على الجمهور لحد ما بقت كراش شباب كتير، وبعد ما كان معظمهم بيبص على البيضا أم عيون ملوّنة، مزاجهم اتغيّر للبنت السمرا أم شعر أصفر..
وتيجي بعدها أسماء أبو اليزيد .. ودي أكتر فنانة محترمة في مصر، وجمالها أسمر ربّاني، ورغم إنها اتعرّضت للتنمر كتير وهي صغيرة وصحابها كانوا بيقولوا عليها “شيكولاتة”، إلا إنها كسرت كل ده وحوّلته لرمز جمال بيسحر كل اللي يشوفها، وبشوية ميكاج خفيف على الوش وشعرها الكيرلي بتبان ولا ملكات الجمال، وبتخطف قلب وعين كل اللي يشوفها على الشاشة..
ودينا الشربينى، لونها الخمري وعيونها السودة وشعرها الكيرلي، وعمرو كان طاير بيها في السما، وغنّى لها بدل الأغنية اتنين وتلاتة، وكل حفلة كان يطلعها معاه ويتباهى بيها قدام الناس..
وأسماء جلال أحلى بنت في جيلها، ومن وقت ظهورها وهي قالبة الدنيا بجمالها، وكانت بتعاني من التنمر من أقرب الناس ليها وهي أمها، واللي كانت دايمًا بتقولها: “متلبسيش شورت، شكل رجلك وحش”، بس أسماء لما كبرت بقيت حاجة تانية خالص، وقدرت بلونها وعيونها السود وشعرها تبقى كراش جيل الألفينات كله..
أما آية سماحة فملكة الليلة وكل ليلة.. وهي دلوقتي واخدة الحتة دي لوحدها، وبقت أيقونة لبنات كتير على السوشيال ميديا، وكلهم بيقلدوها في لبسها وطريقة كلامها وكمان نفسهم يبقوا زيها..
ومش هنتكلم كتير على أمينة خليل.. لأن كل حاجة فيها جميلة من أول لون بشرتها وعيونها حتى شعرها، ورغم إنها كانت بتعاني من التنمر كتير بسبب شكل مناخيرها، لكنها كانت بتعمل ودن من طين وودن من عجين، وبتطلع دايمًا وتقول إن شكلها عاجبها كده ومش بتسمع لرأي حد..
وناهد السباعي مولّعة الدنيا في المهرجانات، وفساتينها بتبقى لفتة نظر الكل، وهي بتختار فساتين تمشي مع لون بشرتها الخمري، وناهد لما طلعت في الأول الكل كان بينتقدها بسبب شكلها، لكنها ورغم كده عمرها ما فكرت تغيّر في شكلها ولا تعمل فيلر ولا بوتوكس ولا أي عمليات تجميل، ودلوقتي هي بقيت مثل أعلى لأي بنت سمرا، وكتير منهم بيشبّهوا نفسهم بيها..
وانتوا بقى قولولنا.. مين أكتر فنانة سمرا بتحبوها، حتى مش من دول؟
عن الكاتب
